Facebook 最好睇嘅係咩？通常都唔係啲post 本身，好多時候都係啲comments 先係最精彩。今日碌Facebook 見到呢個post 覺得冇乜特別，手順撳咗入去comments 睇睇。唔睇由自可，一睇真係不得了。
左膠禍害，要政治正確！
我覺得佢講真話冇問題
政治正確玩到連講事實都係罪
唔… 呢啲真係香港人寫得出嘅comment，仲要攞到大量嘅like? 香港人接受咗西方文化薰陶咁多年，又喺近呢幾個十年不斷爭取民主，斷估自由主義應該都算係香港人嘅共通價值觀掛。自由主義(Liberal Humanism/ Liberalism)相信每個人都係一個獨立而獨特嘅個體，相信每個人都有同等價值；而民主、法治、人權就係自由主義嘅體現。如果係抱有呢個價值觀嘅，就應該要意識到James Watson 所講嘅，其實係典型貶低黑人價值嘅一句話，係一個侵害自由主義嘅攻擊，其實根本未去到要談論「政治正確」嘅層面。
咁其實要看佢有冇實驗證明，定係純粹佢自己覺得喎
其他看似中立嘅人，就會好似上面嘅comments 噉回應，同樣又有唔少嘅like。但諗深一層，如果研究結果證明黑人智商不及白人高又如何? 白種人比有色人種優勝? 黑人唔值得擁有白人嘅權利? 嗱，唔係我自己上綱上線，Watson 自己話佢對於非洲國家前途感到無可避免嘅灰暗，係因為佢覺得非洲人未必有足夠智力理解西方國家嘅社會政策。(Sky News) 簡單嚟講，佢話黑人智商不及白人高，係想證明黑人不配擁有同西方國家同等嘅社會結構。佢依然只係想貶低黑人嘅價值。
正因為噉，其實佢有冇實驗證明根本同冷泉港實驗室褫奪佢榮銜根本冇關係。佢榮銜被褫奪，純粹係因為佢所相信嘅理念同自由主義衝突，認為某啲人種比較低劣，不配得同樣嘅社會結構。有冇實驗結果證明，影響唔到冷泉港實驗室嘅決定。
更加好笑嘅係，其實Watson 嘅睇法其實並不得到實驗證明。科學界普遍同意人種只係一個社會建構(Social construct)，唔同嘅人種其實並無明確基因差異。(Al Jazeera) 黑人嘅智商比白人低，只係Watson 嘅一廂情願。
不過其實我又唔識Watson，Watson 又唔識我，佢講嘅嘢其實我唔太care。最令我痛心嘅係一堆為Watson 護航嘅comments。喂，其實香港人，都係黃皮膚嘅有色人種嚟㗎，你估Watson 真係會覺得黃皮膚並唔劣於白皮膚? 留言嘅人唔單止要為Watson 護航，仲反而要攻擊間實驗室，到底係抱住咩心態? 係咪唔抵得Watson 淨係貶低黑人但係唔貶低黃種人?
不過，其實會唔會係我搞錯咗，自由主義其實已經唔再係香港人嘅價值。人權、民主、人人生而平等呢啲概念，係唔係變咗啱聽嘅時候先攞出來嘅道具? 留低上面嗰啲comment 嘅人可能大我一截，但係我平均仲有五十幾六十年要喺香港生活，唔該，可唔可以留一個合理嘅香港俾我?
